"إليسار نيوز" Elissar News

نحنا اليوم جينا حتى ما تشرب بيروت مياه مسرطِنة... ولأنّو في مصادر مياه وينابيع أقرب لبيروت من سد القرعون وسد بسري.
جينا حتى ما يتدمّر أكبر وادي زراعي بجبل لبنان...
وحتى يبقى نهر الأوّلي يروي مزروعات صيدا، وتبقى الثروة السمكيّة بالنهر....
جينا حتى تبقى أحراش الصنوبر وبساتين الليمون والزيتون...
و حتى ما يتهجّروا أهالى القرى بالشوف وجزّين...
جينا حتى نحمي أكتر من 50 موقع أثري مهدّدين بالتدمير...
وحتى نرفض بناء سد على نقطة إلتقاء فالقين زلزاليين، وعلى أرض كارستية مشقّقة... أهلنا ما نسيوا زلزال ال1956 اللي كان مصدرو منطقة بسري.

قال أحد الوزراء إنو الله خلق لبنان حتى نعمل فيه سدود، عن أيّا سدود عم بيحكي؟
اسألوا أهل الضنية عن سد بريصا اللي كلّف الملايين وما جمّع نقطة مي لأنو طبيعة الأرض الكارستية بلبنان منّا مناسبة للسدود. واسألوا أهل حمّانا عن سد القيسماني اللي ما عبّا ربعو وتسبّب بتلويث نبع الشاغور. ولّا سد القرعون اللي صار بحيرة مجارير ومصدر للأوبئة والأمراض. أو سد شبروح اللي بيتسرّب منّو 30,000 متر مكعّب يوميّاً، بإعترافن، واليوم رايحين يتديّنوا من مؤتمر CEDRE ليصلّحوه. أو سد بلعا اللي اكتشفوا فجأة خلال الأعمال إنو أرضو مليانة بواليع ومغاور وتشققات. عن أي سدود عم بيحكوا؟ عن سد بقعاتة اللي تسبّب بإنهيارات وتشققات بالمنازل المحيطة؟ هيدا المسلسل لازم يتوقّف.

بيقولوا إنو لبنان عم بيعاني من مشاكل بالمي... صحيح. لبنان عم بيعاني من الفساد بقطاع المياه، ومن الشبكة المهترئة اللي بتهدر أكتر من 40% من المنسوب. لبنان عم بيعاني من تعطّل محطات التكرير، والفوضى بإدارة المياه الجوفيّة، ثروة لبنان الأكبر. لبنان عم بيعاني من مافيا السيترنات والمحسوبيّات وتحكّم الشركات الخاصة بمصادر المياه. بدل ما تحلّوا هيدي المشاكل، رايحين تجيبو ميّ المجارير من الجنوب عبيروت تحت شعار تأمين مياه الشرب للفقراء، وبكلفة مليار و200 مليون دولار أغلبها ديون عحساب المواطن الفقير؟ وفوق هيدا كلو بدكن تعملو سد جديد وتدمّرو أراضي الشوف وجزين وصيدا... ما بتستحوا؟
بال2014 اقترح المعهد الفدرالي الألماني لعلوم الأرض والموارد الطبيعيّة خطّة لزيادة تغذية بيروت من نبع جعيتا، اللي هوي أقرب لبيروت من سدود الجنوب وأقل تلوّث من القرعون وكلفتو أقلّ. ليش ما اندعم هالمشروع؟ هل لأنو كلفتو أقلّ وما بيوفّي معكن؟ أو هل لأنّو المعهد الإلماني كشف فسادكن وقال بالحرف الواحد إنو خطّتكن غلط، ومستندة على أرقام غلط؟
اليوم بدنا نتوجّه للبنك الدولي اللي عم بيديّن الدولة مئات ملايين الدولارات حتى تبني هالسد الكارثي،
شعاركن القضاء عالفقر... مشروعكن رح يقضي عالفقير.
شعاركن دعم الصحّة وحماية السكان... مشروعكن رح يعرّض مليونين لبناني لمخاطر السرطان والأمراض والزلازل.
شعاركن التنمية المستدامة... مشروعكن رح يقضي على 6 مليون متر مربّع من أهمّ الأراضي المحميّة.
شعاركن دعم الإرث الثقافي... ومشروعكن دمار لأحد اهمّ المواقع الأثرية بلبنان.
شعاركن الحوار مع الأهالي والمجتمع المدني... صرلنا سنتين عم منجرّب نحكي معكن وإنتو مش عم بتتجاوبوا مع وجع الأهالي وصرخة الجمعيات وخبرا المي والجيولوجيا والبيئة والإقتصاد والآثار...

اليوم سلّمناكن أوّل مرحلة من العريضة اللي وقّع عليها 22 ألف مواطن من كلّ المناطق اللبنانيّة، حتى نطالبكن بسحب تمويلكن لمشروع سد بسري التدميري. ومنحمّلكن مسؤوليّة كلّ شجرة، وكل حجرة، وكل حبّة تراب بمرج بسري. ومنأكّد إنّو الحملة مستمرّة ورح تكبر، والمشروع رح يوقف...
لأنّو إذا أرضنا ما بتعنيلكن... نحنا بتعنيلنا كتير.